الجواب على سؤال : " شناهيا الحالة لي ممكن تبغي تخرج فيها 1000 درهم من الݣيشي و يعطيك 2000 درهم"
للتوضيح فالسبب لي غيخلي الݣيشي يعطيك المبلغ لي طلبتيه بشكل مضاعف هو يلا الموظف البنكي غلط فالعمارة ديال الشباك البنكي، كيفما سبقليا شرحت ليكوم فالݣيشي كيتكون من 4 ديال les cassettes جوج كيعمارو باوراق مالية من فئة 100 درهم و جوج باوراق مالية من فئة 200 درهم، و كل كاسيط مبرمج فيها نوع الاوراق المالية لي كيهز يعني واش 100 ولا 200 و في حالة غلط و عمر الكاسيط ديال 100 درهم بأوراق من فئة 200 درهم هنا فين غادي يصرف الكيشي لزبناء لانه في حالة نتا كزبون بغيتي تخرج 1000 درهم فهو مبرمج يمشي يهز 10 اوراق من الكاسيط ديال 100 درهم(لي غلط الموظف و عمرو بأوراق 200 درهم) فالكيشي غادي يعطي الزبون 10 اوراق من فئة 200 درهم و بالتالي خرج من الحساب البنكي ديالو 1000 لكن خدا 2000 درهم.
طبعا الشباك البنكي قليل فاش كيعطي المبلغ المطلوب من فئة وحد يعني كلها 100 درهم و انما كيخلطها ليك و تا فهاد الحالة بلاصة اوراق 100 غيعطيك 200 درهم.
الحل ديال هاد المشكل هو ان البنك كيقوم باجراء عمليات في حسابات الزبناء لتصحيح المبالغ المالية المسحوبة يعني ماغاديش يطلبو منك ترجع 1000 درهم لي زادك الݣيشي انما غادي يتم سحبها من حسابك مع توضيح نوع و سبب العملية دون الحاجة لاخد الموافقة ديالك لانه خطأ تقني و تصحيحه يدخل ضمن صلاحيات البنك.
ملاحظة الحالة فاش كيغلط الموظف فالعمارة ديال كاسيط واحد ماشي ديال جوج لانه في حالة قلب 200 تا هيا ب 100 فغادي يعطي الفلوس للزبناء ناقصين .